 |
Les cinq principaulx sens de lhomme : situez & organisez en la teste, sont par nature disposez & ordonnez en figure triangulaire. (Charles de bovelles, ) |
Les cinq principaulx sens de lhomme sont, lesquelz on appelle en latin, Imaginatio, Auditus, Visus, Olfactus, Gustus. Cestadire limaginative, les oyes, la veue, lodorement, & le goust. Lesquelz sont situez posez & ordonnez par honeur de nature au plus hault de lhomme, cestascavoir limaginative, comme la plus noble, est situee au plus hault & sommet de la teste, en la rondeur du cerveau. Les oyes, sot posees & organisees aulx oreilles. La veue, aulx deux yeulx. Le sentement ou odorement, es narine. Le goust, en la bouche, ou en la langue situee dedens la bouche. et chascun de ces sens, a son propre et naturel obiect, auquel il est ordoné. car limaginative a pour obiect les apparitions, les visions, & phantasies nocturnes. Les oyes, ont le son, & la voix, les yeulx, la lumiere, & les couleurs. Lodoremet, a toutes les odeurs. Le goust, les saueurs. Ie dis docques, que ces cinq sens honorablement & haultains, situéz & organiséz en la teste, ne sont exemptz de figure Geometrique. Car lordre selon lequel ilz sont naturellement posez & situez en la teste, garde & obserue la belle figure triangulaire : laquelle est la première, & la plus mystique de toutes les figures angulaires.
